Torvelt er að túlka orðin á annan veg en að Kristur heiti því að snúa aftur til jarðar. Allur þorri guðfræðinga lætur sér þó fátt um finnast og staðhæfir að endurkomuna beri að skilja í óeiginlegri eða yfirfærðri merkingu. Þeir hafa sumir fyrir satt að fyrirheitið um endurkomu Jesú Krists hafi ræst, þegar postularnir fylltust heilögum anda, aðrir boða að kirkjan sem slík sé í raun Kristur endurkominn. Þessar hugmyndir stangast að vísu á við það sem í guðspjöllunum stendur, en einhverju verður til að svara, því enginn trúir því lengur í fullri alvöru að Jesús komi aftur.

Á hinum síðustu dögum munu koma spottarar með spotti, er framganga eftir eigin girndum og segja: Hvað verður úr fyrirheitinu um komu hans? Því að frá því að feðurnir [postularnir] sofnuðu [dóu] stendur allt við sama eins og frá upphafi. Pétursbréf 3:3-5

Því er ekki að neita að prestum er þónokkur vorkunn í málinu. Vantrú þeirra er skiljanleg. Er hægt að ætlast til að nokkur maður með heilu viti trúi því að Kristur hafi horfið til himna á skýjabólstri og komi þaðan aftur svífandi á skýi? Skringisögur af þessu tagi samrýmast einfaldlega ekki niðurstöðum vísindanna. Ef til vill hefur Kristur séð ástandið fyrir þegar hann andvarpar sáran og segir: ,,Mun þá mannssonurinn finna trúna á jörðinni, er hann kemur?" Í Pétursbréfi er einnig vikið að vantrúnni á endurkomu Jesú Krists. Þar segir: ,,Á hinum síðustu dögum munu koma spottarar með spotti, er framganga eftir eigin girndum og segja: Hvað verður úr fyrirheitinu um komu hans? Því að frá því að feðurnir sofnuðu [þ.e. postularnir dóu] stendur allt við sama eins og frá upphafi."

Þess ber að geta að þessi dularfullu ,,ský" koma við sögu á fleiri stöðum í Biblíunni. Í Nýja testamentinu segir frá því að skömmu áður en Kristur var krossfestur, tók hann nokkra lærisveina sína með sér upp á hátt fjall. Þar ummyndaðist hann þá að þeim ásjáandi og Móses og Elía birtust þeim og töluðu við Krist. ,,Meðan hann var enn að tala, sjá, þá skyggði bjart ský yfir þá, og sjá, rödd úr skýinu sagði: Þessi er minn elskaði sonur, sem eg hefi velþóknun á; hlýðið á hann."

"Í Gamla testamentinu er á ýmsum stöðum greint frá því hvernig guð opinberar sig í gegnum ,,ský" eða ,,eldstólpa" á himni."

Í Postulasögunni kemur fram áþekkt fyrirbæri þegar fjöldamorðinginn Sál varð fyrir vitrun á leið sinni til Damaskus og tók trú á Jesúm Krist. Sál eða Páll postuli, eins og hann var síðar nefndur, lýsir viðburðinum þannig: ,,[Eg sá], á veginum, um miðjan dag, ljós af himni sólu bjartara leiftra um mig og þá, sem mér voru samferða. Og er vér allir féllum til jarðar, heyrði eg rödd, er sagði við mig á hebreska tungu: Sál, Sál, hví ofsækir þú mig?" Páll segir einnig frá því að ljómi ljóssins sem leiftraði um hann hefði verið þvílíkur að hann blindaðist og urðu förunautar hans að leiða hann til Damaskus.

Í Gamla testamentinu er á ýmsum stöðum greint frá því hvernig guð opinberar sig í gegnum ,,ský" eða ,,eldstólpa" á himni. Í för Ísraelsmanna frá Egyptalandi til fyrirheitna landsins ,,gekk [Drottinn] fyrir þeim á daginn í skýstólpa, til að vísa þeim veg, en á nóttunni í eldstólpa, til að lýsa þeim, svo að þeir gætu ferðast nótt sem dag; skýstólpinn veik ekki frá fólkinu á daginn, né heldur eldstólpinn á nóttunni". Ljóst er að Ísraelsmenn fylgdu fyrirbærinu eftir hvert sem það fór. ,,Og hvert sinn, er skýið hófst upp frá tjaldinu lögðu Ísraelsmenn upp; og þar sem skýið nam staðar, þar settu Ísraelsmenn herbúðir."

Á einum stað segir frá því þegar Móses leiddi fólk sitt að Sínaífjalli til að kynna það fyrir Guði. Það er engu líkara en að ,,skýið" hafi lent á fjallinu, því ,,þykkt ský lá á fjallinu" og ,,var allt í einum reyk, fyrir því að Drottinn sté niður á það í eldinum; mökkurinn stóð upp af því, eins og reykur úr ofni, og allt fjallið lék á reiðiskjálfi". Á öðrum stað er greint frá því að Móses hafi ,,gengið mitt inn í skýið" og dvalist þar í fjörutíu sólarhringa. Þetta minnir á frásögnina af Elía, sem var numinn af Guði upp til himna í ,,eldlegum vagni." Í Sálmunum kemur fram sú skoðun að ,,skýstólpinn" sé farkostur Guðs. Guð ,,gjörir ský að vagni sínum, sem fer um á vængjum vindarins." Jeremía segir ennfremur: ,,Sjá, eins og ský þýtur hann áfram og vagnar hans eru eins og vindbylur."

Öllum má ljóst vera að ,,ský" þau sem hér eru til umræðu eru á engan hátt sambærileg við hnoðra þá sem sjást á himni á degi hverjum. ,,Skýið", sem leiddi Ísraelsmenn yfir eyðimörkina, sem Móses gekk inn í, sem flutti Jesúm til himna, sem sló Pál blindu, minnir öllu frekar á fyrirbæri þau, sem sést hafa á himni á undanförnum áratugum og nefnd eru fljúgandi diskar.

Ef marka má lýsingar sjónarvotta eru hin torkennilegu geimför oft og tíðum, sem egglaga ský að degi og gefa frá sér rósrauðan bjarma þegar þau sjást þjóta áfram að næturlagi. Dæmi eru um að fólk, sem hafi komið of nálægt slíku geimfari, hafi verið slegið blindu sökum ofbirtu, líkt og Páll postuli forðum. ,,Eldvagnarnir" hafa sést í nær öllum löndum heims og vísindamenn, sem rannsaka þessi mál staðhæfa að þeir sjáist nær vikulega einhvers staðar á jörðinni.

Þann 7. janúar rakst belgískur kaupsýslumaður á þessar utanjarðarverur í Warneton við landamæri Frakklands og Belgíu. Hann fylgdist með þeim úr bíl sínum og sá þær fara ásamt þriðju verunni um borð í geimskip sem hvarf jafnharðan á brott.

Á undanförnum árum hafa sérfræðingar rannsakað skýrslur sem fram hafa komið um ókennda fljúgandi hluti. Hér verður greint frá niðurstöðum rannsóknarnefndar er franska stjórnin skipaði til að kanna umrædd fyrirbæri. Claude Poher, yfirmaður eldflaugadeildar geimrannsóknamiðstöðvarinnar í Toulouse, veitti rannsóknarnefndinni forstöðu og starfaði hún í fjögur ár. Nefndin tók til meðferðar um þúsund ,,trúverðugar" skýrslur, þar af yfir tvö hundruð frá Frakklandi. Rannsóknarnefndin tók tillit til aðstæðna hverju sinni, svo sem veðurskilyrða, hvort loft var skýjað o.s.frv. er hlutirnir sáust, og hvort þeir sáust yfir þéttbýlissvæðum eða óbyggðu landi.

Í sjötíu af hundraði tilvika voru hinir ókenndu hlutir séðir samtímis af tveimur eða fleiri mönnum og í nokkrum tilvikum jafnvel af íbúum heilla borga. Sjáendur ,,hlutanna" voru menn úr öllum starfsgreinum.

Átta af hverjum tíu mönnum, sem sáu ,,fljúgandi diskana", fullyrða að þeir hafi verið egglaga og aðeins tveir af hverjum tíu sáu flugtækin með annarri lögun.

Í 70% tilvika sáust ,,hlutirnir" að næturlagi og voru þá rósrauðir á lit, en þeir sem sáust í dagsbirtu voru með málmgljáa, samkvæmt skýrslum sjónarvotta.

Yfirleitt var um að ræða flugtæki sem virtust vera milli 10 og 30 metrar að þvermáli, að áliti sjónarvotta, og hreyfðust algerlega hljóðlaust. 25% álíta sig hafa séð ,,diska" sem fóru hægt yfir og enn aðrir sáu ,,diska" sem þeir telja að hafi farið með óvenjulegum hraða. Í 50% tilvika telja sjónarvottar að flugstefnan hafi verið ,,óvenjuleg" ef miðað er við flug þekktra gerða af flugvélum. Að lokum fullyrða um 20 af hundraði sjónarvotta að þeir hafi verið viðstaddir lendingu ,,fljúgandi diska".

"Ef marka má lýsingar sjónarvotta eru hin torkennilegu geimför oft og tíðum, sem egglaga ský að degi og gefa frá sér rósrauðan bjarma þegar þau sjást þjóta áfram að næturlagi."

Þó að til séu ritaðar heimildir frá ýmsum tímum um óþekkta furðuhluti á himni, fóru frásagnir af viðlíkum fyrirbærum ekki að vera almennar fyrr en við lok seinni heimsstyrjaldar.

Talið er að fljúgandi diskar hafi fyrst sést hér á landi, svo vitað sé, 13. júní 1947. Það sama ár sáust sams konar fyrirbæri í fyrsta sinn í Bandaríkjunum og reyndar í mörgum öðrum löndum heims. Í upphafi fimmta áratugarins kvað svo rammt að þessu hér á landi að fólk tók að nefna fyrirbrigðin ,,gljáský". Síðari hluta ársins 1952, sáust skínandi loftför víðs vegar um land, og sá fjöldi fólks fyrirbærin. Um atvikin var töluvert ritað í dagblöðum á þeim tíma. Í Morgunblaðinu, 29. október 1952, er t.d. greint frá óþekktum loftförum yfir Akureyri:

,,Síðastliðinn sunnudag [þ.e. 26. október] sáu allmargir bæjarbúar eldhnetti á himni, er flugu með feiknahraða í nokkurri hæð fyrir austan bæinn. Himinn var alskýjaður, 600-1.000 metra skýjahæð, sem næst logn og um 6 stiga hiti. Eftir lýsingu sjónarvotta virðist sem eldhnettirnir hafi hagað sér með líku sniði og fréttir erlendis frá lýsa hinum alkunnu fljúgandi diskum."

3. nóvember birtir Tíminn frásögn af áþekku fyrirbæri, sem sást á Austfjörðum. Þar segir undir fyrirsögninni ,,Hundruð Austfirðinga sáu eldkringlu geysast inn yfir landið.":

,,Klukkan 5-10 mínútum yfir fimm á sunnudagskvöldið sáu Austfirðingar eldhnött mikinn og ókennilegan svífa inn yfir landið úr austri og hverfa inn yfir hálendið í vestri. Ber öllum sjónarvottum, sem munu vera svo hundruðum skiptir, saman um það, að þetta hafi ekki líkst venjulegu stjörnuhrapi. Af loftfara þessum lagði skæra birtu, er sló á land og loft, og aftur úr honum var ljósrák eða rákir, er sumir töldu líkjast eldglæringum."

Þórður Þórðarson, þáverandi oddviti Hrunamannahrepps, sá skömmu síðar ,,eldhnött" sem fór á feiknahraða rétt yfir heimili hans í Syðra-Langholti. Honum segist svo frá: ,,Allt í einu sá ég eldhnött sem kom úr suðri með geysihraða. Hann fór rétt yfir eða við hornið á íbúðarhúsinu, sem ég var í og hvarf mér til norðurs yfir útihús, sem eru norðar og standa nokkru hærra en íbúðarhúsið, enda virtist mér hann ekki fara í meir en tveggja metra hæð yfir þök þeirra. Hnöttur þessi virtist mér sem hlemmur í laginu og nokkru stærri en stór súpudiskur. Hann var hvítglóandi og virtist blágrænn baugur umhverfis hann."

Þessi mynd af ,,fljúgandi diski" var tekin úr farþegavél Avena-flugfélagsins í Venesúela árið 1963. Á myndinni sjást greinilega skuggar ,,disksins" og flugvélarinnar. Þetta loftfar minnir á ,,eldhnöttinn" sem Þórður Þórðarson, oddviti Hrunamannahrepps, sá árið 1952 yfir heimili sínu í Syðra-Langholti.

Þessar og aðrar yngri lýsingar á einkennilegum fyrirbærum á himni gefa okkur tilefni til að halda að við séum ekki ein í alheiminum. Hinn 23. desember 1995 birti Morgunblaðið eftirfarandi frétt undir fyrirsögninni: ,,Bjart ljós með rauðleitum blæ":

,,Torkennilegt ljós sást frá flugvellinum á Blöndudósi á fimmta tímanum á fimmtudag. Birgir Ingólfsson einkaflugmaður segist fyrst hafa haldið að flugvél væri að koma inn til lendingar. Hann fylgdist svo með því þegar ljósið hvarf á bak við Víðidalsfjall, birtist aftur og hvarf smám saman í suðvesturátt. Ljósið var bjart með rauðleitum blæ og fór skrykkjótta leið lágt á himninum. Svipað ljós sást fyrir utan Borgarnes upp úr kl. 18. Hann segist hafa hringt í bónda í Vatnsdal. Sá hafi farið út og séð ljósið. ,,Bóndinn hélt svo áfram að fylgjast með þegar ljósið hvarf mér á bak við Víðidalsfjallið fimmtán til tuttugu mínútum eftir að ég sá það fyrst. Hann sagði mér að ljósið virtist stoppa yfir fjallinu og lýsa upp hluta af því," segir hann. ,,Þegar ég var að búa mig undir að fara heim tíu til fimmtán mínútum seinna sá ég svo ljósið koma aftur fram undan Víðidalsfjallinu og stefna í vestur eða norðvestur. Ljósið bar svo lágt að um þriðjungurinn af fjallinu var fyrir ofan. Ég hringdi í flugmálastjórn þegar ljósið var farið að fara í suðvestlægari stefnu inn á flugleiðina til suðurs og hélt kannski að þarna væri þyrla með leitarljós í æfingaflugi. Þeir könnuðu málið hjá Landhelgisgæslu, Keflavíkurflugvelli og flugturni og ekki var vitað um neina þyrlu." Birgir segir að ljósið hafi smám saman fjarlægst og dofnað suðvestur. Hann hafi haft samband við mann í Borgarnesi. Maðurinn hefði séð áberandi ljós á himni í norðri fara í vestsuðvestur og hverfa í vesturátt upp úr kl. 18. Eftir atburðinn segist Birgir ekki hafa hugmynd um hvernig megi skýra ljósið. Hann hafi séð stjörnuhrap og halastjörnu en ljósið hafi ekki líkst því. Ljósið hafi verið lágt á himni, í um 2.000 til 2.500 feta hæð til að byrja með, og hafi næst komið 10 til 15 mílur að flugturninum."

"Árið 1961 staðhæfði t.d. Joseph Simonton, sem býr í Wisconsin í Bandaríkjunum, að geimskip hafi lent í húsagarði sínum og utanjarðarvera gengið út og gefið sér brauðsneið!"

Verulegur hópur fólks í ýmsum löndum segist hafa orðið vitni að lendingu óþekktra loftfara og jafnvel staðið augliti til auglitis við verur frá öðrum stjörnum. Árið 1961 staðhæfði t.d. Joseph Simonton, sem býr í Wisconsin-fylki í Bandaríkjunum, að geimskip hafi lent í húsagarði sínum og utanjarðarvera gengið út og gefið sér brauðsneið! Til að kanna nánar þessa ótrúlegu frásögn sendi bandaríski flugherinn dr. J. Allen Hynek á vettvang. Dr. J. Allen Hynek er stjörnufræðingur og var á þeim tíma vantrúaður á lýsingar af fljúgandi furðuhlutum og flokkaði þær undir missýningar. Hann færði vísindamönnum flughersins hina fágætu brauðsneið til rannsóknar og kom í ljós að hún var að öllu leyti eðlileg og innihélt næringarríkt heilhveiti. Dr. Hynek álítur að reynsla Joseph Simontons hafi verið raunveruleg. Dr. Jacques Vallee rannsakaði jafnframt þennan atburð og er sannfærður um að Simonton hafi sagt satt. Simonton hefur sjálfur enga hugmynd hvers vegna hann, af öllum íbúum jarðar, var valinn til að veita þessari óvenjulegu gjöf viðtöku.

Vísindamenn hafa rannsakað gaumgæfilega frásagnir fólks af kynnum af geimverum. Í því skyni beittu þeir lygamælingum og ítarlegum yfirheyrslum, líkt og um rannsókn á glæpamáli væri að ræða, einnig dáleiðslu og læknisfræðilegu mati á andlegri og líkamlegri heilsu viðkomandi einstaklinga. Þeir gátu enga skýringu gefið á því hvað orsakaði reynslu fólksins. Engu að síður eru margir vantrúaðir á að skynsemi gæddar verur frá öðrum hnöttum ferðist um geiminn í geimskipi og komi til jarðarinnar þegar þeim býður svo við að horfa.

Joseph Simonton virðir fyrir sér brauðsneiðina sem meint utanjarðarvera gaf honum formálalaust. Þessi sérstæða uppákoma minnir á orð Jesú Krists: ,,Ég er brauðið sem niður steig af himni." Sjá Jóhannes 6:41-52.

Englar eru annað fyrirbæri í Biblíunni sem fæstir hafa nokkra trú á. Orðið engill er dregið úr grísku og merkir boðberi. Á málverkum kirkjunnar eru englar yfirleitt hafðir með vængi, en í Biblíunni eru þeir aldrei útskýrðir þannig. Samkvæmt Ritningunni eru englar mennskir í útliti, fullkomnari verur í mannsmynd, sem koma að ,,ofan"; frá öðrum heimi. Verurnar grípa skyndilega inn í rás atburðanna á afgerandi hátt og hverfa að því loknu jafnharðan. Svo virðist sem samneyti þeirra við jarðarbúa sé haft í algeru lágmarki. Í öndverðu fóru ,,englarnir" hins vegar ekki huldu höfði. Í 1. Mósebók er sagt frá þeim tíma er ,,synir Guðs höfðu samfarir við dætur mannanna og þær fæddu með þeim sonu." Þar segir: ,,Er mönnunum tók að fjölga á jörðinni og þeim fæddust dætur sáu synir Guðs, að dætur mannanna voru fríðar, og tóku sér konur meðal þeirra, allar sem þeim geðjuðust."

"Í öndverðu fóru ,,englarnir" hins vegar ekki huldu höfði. Í 1. Mósebók er sagt frá þeim tíma er ,,synir Guðs höfðu samfarir við dætur mannanna og þær fæddu með þeim sonu.""

Jesús Kristur fullyrðir margoft að hann sé í tengslum við verur frá öðrum heimi. Hann sagði við samtíðarmenn sína: ,,Þér eruð neðan að, ég er ofan að. Þér eruð af þessum heimi, ég er ekki af þessum heimi." Kristur sagði jafnframt: ,,Sá sem kemur að ofan, er yfir öllum. Sá sem er af jörðu, hann er af jörðu og talar af jörðu. Sá sem kemur af himni, er yfir öllum og vitnar um það, sem hann hefur séð og heyrt og enginn tekur á móti vitnisburði hans."

Það má til sanns vegar færa að utanjarðarverur hafi haft hönd í bagga með upprisu Jesú Krists. Í Lúkasarguðspjalli segir frá því að þegar Kristur ummyndaðist á fjallinu stóðu tveir menn hjá honum og ,,ræddu um brottför hans, er hann skyldi fullna í Jerúsalem." Mennirnir, sem lærisveinarnir álitu vera Móses og Elía, hurfu á brott með ,,skýi" eftir að hafa ráðfært sig við Krist um upprisuna. Þá er kunnugt að þegar María Magdalena og fleiri konur fóru til að líta á gröf Jesú voru þar fyrir ,,tveir menn í leiftrandi klæðum". Í Jóhannesarguðspjalli er talað um ,,tvo engla í hvítum klæðum". Í Mattheusarguðspjalli er sagt frá því að jarðskjálfti hafi orðið ,,því engill Drottins sté niður af himni" og ,,var sem elding ásýndum og klæðin hvít sem snjór."

Utanjarðarverur koma einnig við sögu á Olíufjalli þegar Jesús Kristur yfirgefur jörðina í ,,skýi" að lærisveinum sínum ásjáandi. Þá stóðu hjá þeim tveir menn í hvítum klæðum og sögðu: ,,Galilíumenn, hví standið þér og horfið til himins? Þessi Jesús, sem var upp numinn frá yður til himins, mun koma á sama hátt og þér sáuð hann fara til himins." Í Opinberun Jóhannesar segir að Jesús Kristur komi aftur sem sigurvegari og að með honum verði ,,hersveitirnar, sem á himni eru." Kristur segir sjálfur að ,,eins og elding, sem leiftrar og lýsir frá einu skauti himins til annars, svo mun Mannssonurinn verða á degi sínum... En þann dag og stund veit enginn, hvorki englar á himnum né sonurinn, enginn nema faðirinn einn."