Flest höfuðrök Webers í greininni eru eitthvað sem er fyrir löngu búið að hrekja, eins og til dæmis ,,Leuchter-skýrslan" sem hélt því fram að gasklefarnir hefðu ekki getað virkað eins og haldið var fram. Það eru fáir sem leggja trúnað á Leucther-skýrsluna í dag því að hún hefur verið hrakin algerlega og sýnt fram á að hún er í raun tilbúningur á köflum þar sem Fred Leucther er að geta í eyðurnar varðandi útlit og notkunarmöguleika bygginga sem voru sprengdar í loft upp árið 1945! (sjá t.d. TRUTH PREVAILS: Demolishing Holocaust Denial: The End of the Leuchter Report

Annar fræðimaður sem Weber vitnar í er William B. Lindsey efnafræðingur. Hann var einnig vitni verjenda í Zündel-málinu og hélt því fram að Zyklon B (3/4 hlutar vetnisblásýra) hefði aldrei drepið neinn í útrýmingarbúðunum, m.a. vegna þess að dyrnar á gasklefunum hefðu verið óþéttar tréhurðir og gasið hefði getað lekið út. Þetta byggði hann á ályktunum sem hann dró af því sem hann sá á staðnum í kringum 1980. Hins vegar er ekki til nema ein hurð sem er talin vera af gasklefunum sjálfum og sú er rammgerð járnhurð styrkt með stálboltum yfir hana þvera. Þeirri gerð ber saman við framburði vitna úr búðunum sjálfum. Lindsey er því á villigötum hér.

"Hann varð hins vegar að játa að það hitnar fljótt í kompu þar sem 100-200 manns er troðið inn og suðumark blásýrukristallanna er aðeins 26 gráður!"

Einnig hélt hann því fram að blásýrukristallarnir hefðu ekki getað leyst upp nógu fljótt því að það hefði verið of kalt í klefunum sem voru neðanjarðar. Hann varð hins vegar að játa að það hitnar fljótt í kompu þar sem 100-200 manns er troðið inn, og suðumark blásýrukristallanna er aðeins 26 gráður! Þessi fullyrðing hans féll því um sjálfa sig. Framburður Lindseys hefur því jafn lítið vægi í þessari umræðu og framburður Leuchters. Jafnvel endurskoðunarsinninn David Irving hefur lítið álit á William B. Lindsey og ,,sérfræðiáliti" hans.

Þessi tvenn ,,grundvallarrök" Mark Webers standast því ekki nánari skoðun og falla dauð og ómerk.

Weber eyðir í greininni miklu púðri í að sannfæra lesandann um að margt hafi breyst í áliti og þekkingu manna á Auschwitz og þeim fjölda sem dó þar. Það er svo sem alveg rétt að flestir eru nú sammála um að það sé fáránlegt að halda að fjórar milljónir hafi dáið þar. Sú tala er að öllum líkindum einhvers staðar á milli 900 þúsund og 1,6 milljónir, meirihlutinn gyðingar. Hér erum við að tala um einar útrýmingarbúðir og það breytir því ekki að fjöldi gyðinga í Evrópu var 5,7 milljónum færri eftir stríð, þar af er talið fullvíst að rúmlega fjórar milljónir hafi fallið í útrýmingarherferð nasista á stríðsárunum.

Fullyrt er að Fred A. Leuchter hafi villt á sér heimildir með að þykjast vera verkfræðingur og hefur skýrsla hans um gasklefana í útrýmingarbúðum nasista verið dregin í efa.

Villan sem Weber gerir hins vegar er að leggja út af þessari eðlilegu heimildaendurskoðun sem orðið hefur síðan 1945 og leiða af því að þess vegna verði að endurskoða helförina alla, hún hafi aldrei farið fram. Þar liggur skyssan hjá honum.

Allt þetta kýs Mark Weber að þegja um og þar gerir hann sig sekan um stóra fræðilega skyssu. Hann lítur einfaldlega fram hjá þeim heimildum sem ganga gegn þeirri lokaniðurstöðu sem hann vill sjá. Tilgangurinn ræður heimildanotkuninni og hann minnist ekki á það sem kemur æskilegri niðurstöðu illa. Ég sem sagnfræðingur tek því ekki nokkurt einasta mark á því sem Mark Weber er að skrifa í þessari grein, til þess er of margt í henni sem er einfaldlega rangt eða byggt á lélegum og/eða vafasömum heimildum svo vægt sé til orða tekið.

Það sem mér þykir verst í þessu er að maður er endalaust að heyra um og sjá greinar og skoðanir frá fólki sem í raun veit ekki betur og heldur að þetta séu góðar greinar og traustar heimildir. Það eru svo fáir sem í raun reyna að finna báðar hliðar á málinu og taka svo gagnrýna afstöðu. Menn halda að þetta sé bara kúl samsæriskenning þegar í raun er um að ræða líf milljóna manna. Greinar eins og þessi eftir Mark Weber er einfaldlega slæm og illa unnin sagnfræði og gera engum gagn, hvorki okkur né málfrelsinu.